TÍRALLE DA LINGUA. PREMIOS FASE PREVIA.

14 – 11 -2019 A semana pasada tivo lugar no salón de actos do Murguía a fase previa do concurso de relatos orais, TÍRALLE DA LINGUA, no que houbo un nivel altísimo nos competidores  e competidoras, ós que felicitamos polas súas soberbias actuacións. Foi moi complicado elixir os gañadores deste ano, que nos representarán ademais na fase final a celebrar proximamente en Santiago de Compostela. Despois dunha dura deliberación o xurado elixiu como vencedora a Laura Canedo (3º E ESO); e como segundas clasificadas a Carolina Castro (1º B ESO) e Julia Meléndez (1º H ESO). Parabéns ás vencedoras e tamén a tod@s @s participantes, que nos deleitaron cos seus fermosos relatos orais!!! Moita sorte para a fase final de Santiago!!!    

MEDO ME DÁS! ENTREGA DE PREMIOS.

O venres, 8 de novembro, celebramos no salón de actos do instituto a fase previa do concurso de relatos orais Tiralle da Lingua. Feito que aproveitamos para facer entrega do premio MEDO ME DÁS!  a Álvaro Fuentes Campaña, alumno de 2º ESO G , que foi o vencedor coa obra Unha fría noite de inverno. Trátase dun excelente texto de terror situado no medievo, perfectamente documentado, e que foi elixido por unanimidade, polo xurado do certame, como o mellor dos presentados. Temos que dicir que o nivel foi moi alto, de xeito que felicitamos tamén a todos e todas as participantes polos seus magníficos relatos. Convidámosvos a que sigades participando nos vindeiros certames, dos que vos iremos informando proximamente. Parabéns a Álvaro e tod@s @s participantes!!

O ALUMNADO DE 4º ESO NA RAG / CASA MUSEO EMILIA PARDO BAZÁN.

4-11-2019 No IES Manuel Murguía de Arteixo temos por costume achegarnos cada ano á cidade vella da Coruña, para facer unha visita obrigada á RAG e á Casa Museo Emilia Pardo Bazán, dous lugares imprescindibles que queremos que todo estudante do noso centro teña a oportunidade de coñecer. Ademais, sempre aproveitamos para percorrer as históricas rúas da cidade Herculina e ensinarlles inmobles e lugares de interese, que ás veces pasan desapercibidos ó viandante e que serven de mostra da enorme riqueza cultural que agocha esta cidade. Falamos de enclaves como o monumento a Curros, a antiga sede da revista Alfar e da editorial Nós, a casa onde viviu e morreu Manuel Murguía e a súa filla Gala, o lugar onde expuxo as súas primeiras obras Picasso, as Irmandades da Fala, o lugar onde morreu Sir John Moore e tamén o monumento homenaxe a este persoeiro, as casas onde viviron Rosalía de Castro, Juana de Vega e Francisca Herrera… O tempo, como é costume, non acompañou, pero pensamos que a saída pagou a pena. Queremos tamén agradecer o comportamento excepcional do alumnado e a profesionalidade do persoal da RAG/Casa Museo Emilia Pardo Bazán. Agardamos a saída fóra de proveito!  

CONTOS DE MEDO NO MURGUÍA CON PAULA CARBALLEIRA

O luns, 21 de marzo de 2019, visitou o noso centro Paula Carballeira (actriz, escritora, contacontos,…), quen nos deixou un sorriso na boca e algo de medo, despois de asistir á súa actuación. Os fantasmas, mortos e demais criaturas propias do Samaín pasaron polo escenario do salón de actos, onde a rapazada gozou dunha hora moi divertida. A actividade foi organizada polo Departamento de Lingua Galega e Biblioteca. Moitas grazas a todas e todos os asistentes, á organización e, sobre todo, a Paula, por facernos pasar un anaco tan agradable e pola súa simpatía!!! Aquí van algunhas fotos:    

VIDEOCONFERENCIA CO INSTITUTO CAÑADA BLANCH DE LONDRES

O 11 de xuño de 2019 realizamos unha videoconferencia co alumnado de 4º ESO do Instituto Cañada Blanch de Londres, no que se estuda a materia de Lingua Galega. Puidemos comprobar o bo nivel de galego que teñen os alumnos londinenses  e  a rapazada do Murguía intercambiou información sobre as diferentes inquedanzas que temos en cada un dos países. Agradecemos á profesora Begoña González a súa amabilidade e as facilidades para levar a cabo esta actividade. Un saúdo amig@s de Londres!!

EXPOSICIÓN SOBRE AS NOSAS ÁRBORES

No corredor da cafetaría podedes visitar a exposición sobre as árbores que circundan o noso centro escolar, froito da colaboración co Departamento de Bioloxía O traballo está acompañado dun plano para localizar as árbores en distintos lugares do patio. Agardamos que vos guste!!    

ENTREGA DE PREMIOS DE EDL DO MURGUÍA

O 16 de maio entregáronse os premios de poesía e deseños que cada ano convoca o EDL do noso instituto. Este ano os vencedores foron: -Hugo Herrador Segade de 2º A ESO na categoría de poesía (III edición do Premio Viveiro de Poetas do Murguía). -C.R.V. na categoría de deseños (III edición do Premio de Deseños Adhírete ás Letras). Parabéns para ambos!!!

O MURGUÍA CONSEGUE VARIOS PREMIOS NO FESTIVAL CINEOI DA CORUÑA.

O alumnado do IES Manuel Murguía de Arteixo acadou varios premios na gala celebrada o pasado mércores, día 8 de maio, na Escola Oficial de Idiomas da Coruña. Os galardóns conseguidos na categoría xuvenil foron os seguintes: -1º PREMIO:  No ollo do inimigo. Paula López Sánchez, Yésica Romero Rodríguez, Alba Freire Pose, Ainhoa Cotelo Lista, Sofía Iglesias Fariña, Sofía Vilas González, Lucía López Calvete, María Muñiz Veiga e Verónica Rodríguez Rossi. -2º PREMIO: Acoso nas aulas.Laura Baña Caamaño, Carla García Díaz, Alba Suárez Bolón e Pepa Villaverde Patiño. -3º PREMIO  (ex aequo): Enfermidades mentais. Florencia Delbono Gascón, Nicolás Paz Boedo e Samuel Bao Oliva; e Rúa do percebeRodrigo Alonso Romar, Gabriel Boquete Manteiga, Natalia Lois Filgueira, José David Rodríguez Reyes e Alejandro Souto Costa. -PREMIO BEN FALADO: Desta non te libras. Claudia Veiga Riveiro, Lydia Blanco Bello, Nerea Pazos Martínez, Amanda Nogalego Lago, Emma Balbís Rodríguez, Iris Amado López e Marina Boga Bello. -PREMIO DO PÚBLICO: O monte. Andrea Bouzón Vigo, Raquel Sánchez Ferrol, Ander Caamaño García, Meryem Ezzekraoui Ezzekraoui, Denise Vázquez López e Alex Otero Doce. Parabéns a tod@s!!!    

O IES MANUEL MURGUÍA ASISTE AO CONCERTO DE SÉS NA CORUÑA.

O alumnado de 2º ESO asistiu o pasado mércores, 24 de abril de 2019, ao concerto da cantante SÉS no centro ÁGORA da Coruña. A rapazada puido gozar da música desta fantástica artista e  falar con ela, quen incluso accedeu a retratarse cos nosos alumnos e alumnas. Queremos dende aquí dar as grazas ao concello da Coruña, que nos facilitou a asistencia a esta actividade; a SÉS pola súa simpatía e profesionalidade; e aos nosos rapaces e rapazas do Murguía polo seu comportamento exemplar. Agardamos que vos gustara!! Aquí van algunhas fotos.  

PRADOLONGO E O SEU DIRECTOR, IGNACIO VILAR, NO MURGUÍA.

Hoxe tivemos o pracer de que nos visitara o director de cine Ignacio Vilar, autor de obras como A esmorga, Pradolongo, ou Sicixia; entre outras. Puidemos falar con el da súa carreira e filmografía, e de aspectos relacionados coa nosa cultura. Queremos agradecer dende aquí á produtora Vía Láctea o seu apoio e tamén ao concello de Arteixo pola cesión do auditorio. Grazas tamén a Ignacio Vilar pola súa simpatía, e ao alumnado polo seu magnífico comportamento.  

DOLMEN DE DOMBATE, CASTRO DE BORNEIRO E CASA DE PONDAL.

5 -4-2019 O alumnado de 1º Bacharelato 4º e 3º ESO tivo a oportunidade de coñecer un dos monumentos megalíticos máis importantes da nosa terra: o Dolmen de Dombate. Tamén se aproveitou a viaxe  para achegarnos ao fermoso Castro de Borneiro e á casa natal do poeta Eduardo Pondal, que neste curso é obxecto de estudo na materia de Lingua Galega e Literatura e que está relacionado vital e literariamente con estes lugares. Aquí tedes algunhas fotos!      

O ESCRITOR HÉCTOR CAJARAVILLE VISITA O NOSO INSTITUTO

Hoxe, 2 de abril de 2019, tivemos a sorte de contar coa visita do escritor Héctor Cajaraville,  que acudiu ao noso centro para falar da súa novela “O segredo da casa de Formoso”. Esta obra foi obxecto de estudo por parte do noso alumnado, que puido preguntar ao autor sobre a temática, os espazos, personaxes, e sobre todo aquilo que lles suxeriu a súa lectura.   Agradecemos a Héctor  Cajaraville a súa simpatía e amabilidade, o mesmo que á editorial Santillana/Obradoiro por facilitarnos a súa presenza.

CALIGRAMAS DO ALUMNADO DE LITERATURA GALEGA 4º ESO.

Nos corredores de 3º e 4º ESO podedes contemplar as creacións dos vosos compañeiros sobre as vangardas literarias. Trátabase de facer unha homenaxe a este movemento rompedor que xurdiu a comezos do s. XX, a través de caligramas e colaxes. No mural que expoñemos tedes unha selección dos que máis nos sorprenderon. Agardamos que vos gusten!      

Verso Libre. Hugo Herrador Segade. 2º ESO

Verso libre Estrofas… Todas iguais Sempre riman Pero nunca brillan. Sonetos, Cuartetos, Terceros, Liras… E que máis dá? Non debemos ser Estrofas. Debemos desencadearnos Soltarnos Liberarnos E converternos Dunha vez por todas En versos libres   Hugo Herrador Segade. 2º A ESO.

SABES? – Hugo Herrador Segade. 2º A ESO.

Poema de amor. Sabes? Estou desexando Volverte a ver. Sabes que non aguantaría Sen verte Máis duns días. Sabes? Eres ledicia Eres luz Na miña vida. E se non sabes isto Dígocho: Quérote. Hugo Herrador Segade. 2º A ESO.

QUERO. Hugo Herrador Segade. 2º A ESO.

Quero un sorriso Quero collerte da man Quero pensar Que te vou namorar Quero que me alegres a vida Quero estar contigo un día Quero lembrarte Que te quero. Hugo Herrador Segade. 2º A ESO.

POEMA DE AMOR. Sara García Vega e Samuel Bao Oliva. 4º B ESO.

Poema de amor. O teu pelo rozando os meus beizos noutra noite de paixón a túa cabeza inclinada no meu peito as túas palabras cravadas no corazón recordos fugaces inundan a miña mente mentres me abrazas e me bicas na fronte mentres estamos no banco de sempre pero sinto non ser o de sempre poesía son as túas curvas e esos ollos vidrosos poesía son as túas meixelas vermellas e os teus abrazos melosos non quero irme de aquí, así desexo o mellor para ti, feliz San Valentín. Sara García Vega e Samuel Bao Oliva 4º B ESO.

Cantiga de amor. Brais Gil. 3º F ESO.

Cantiga de amor Senhor mía, que coita teño eu non podo durmir polo teu amor non podo comer polo teu amor morro de amor. Senhor mía, que coita teño eu por non me poder querer. Senhor mía, que coita teño eu que fermosa ti es entre todas as mulleres que bon parecer ti tes senhor mía, que coita teño eu por non me poder querer.   Brais Gil Lamas. 3º F ESO

Contos de nenos

Contos de nenos Pequenas cartas, contos de nenos, din que estamos na idade para deber o ceo. Amor e paixón, historietas de nenos, din os adultos, con divorcios nos petos. En algo estaremos a errar, neste louco proceso de amar, será no último momento en que decidimos madurar. Pois portémonos como nenos, grandes pero pequenos. Lara Boedo Calvete.

AMOR ETERNO. Hugo Herrador Segade. 2º A ESO.

Amor eterno Hoxe xa non importan As palabras Querémonos E con iso basta. Se o mundo vai explotar Dános completamente igual Porque nos temos E entendémonos. Xa pasou o 14 de febreiro Pero sígote querendo O meu corazón actuou libremente E se decidiu quererte Por algo sería. Hugo Herrador Segade. 2º A ESO.

POEMA DE AMOR. Ainara Pérez Caamaño. 3º F ESO.

Poema de amor E ti pregúntasme que é o AMOR? Amor é non pensar máis que nesa persoa Morrer de ganas de estar xuntos Onte, mañá é sempre Rompendo as trabas que atopemos. O mais importante é… Aínda que queiras, sempre quérete máis. Mentres ti esteas ben, farás ben ó teu arredor. O que consigas con amor durará por sempre. Respecta sempre e non permitas que non o fagan contigo. Pero sobre todo….que cada un teña a liberdade de elixir a persoa coa que compartir o viaxe da vida Ainara Pérez Caamaño 3°E

DÍA DOS NAMORADOS 2019

Como cada ano os vosos compañeiros e compañeiras deléitannos cos seus versos de amor neste Día dos Namorados. Podedes lelos na nosa páxina, na sección Blog, ou nos corredores de entrada á biblioteca, onde os temos recollidos en papel. Agardamos que vos gusten e animámosvos a participar!!

Poema de amor

Poema de amor. Claudia Doel Malvárez. 4º B ESO.

Poema de amor.   Por moito que non quixen acabei facéndoo, Deixei de quererme e só te quixen a ti. O peor de todo é que foi inconscientemente. Que dor. Pero chega o inverno e ti xa quedaches atrás, e volvemos a eses sentimentos medo, medo a deixar de ser suficiente, medo a que non exista o interese. Medo a perder. Así que poño punto e final á historia Oxalá encontres a unha persoa Que sexa como un paraíso, cheo de felicidade e amor. Conténtome con saber que non encontrarás Un desastre coma min. Así que agora deixando as pantasmas atrás Deixo unha mensaxe para min mesma: Non necesitas a ninguén, Mais que a ti mesmo É difícil, seino Pero o amor propio é o mais importante.   Claudia Doel Malvárez. 4º B ESO.    

POEMAS DE AMOR. Pablo Varela Guimarey e Christian Blanco Lago 4ºB ESO

UNHA ROSA VERMELLA    Unha rosa vermella que non se fai vella, un amor de película parecido a dor de clavícula. Ela asemellaba que baixou do ceo sendo unha estrela rodeada de xeo, o meu corazón xa non ten alegría é unha poesía fría. As perlas da súa cara fan que eu teña unha tara non será fácil conquistala é unha muller mala. Pablo Varela Guimarey e Christian Blanco Lago. 4ºB ESO

POEMA DE AMOR. Jacobo Amado Calvo e Yago Calvete Bujía. 4ºB ESO.

“AGARIMO” Somos, a luz ao final da escuridade, a ledicia, despois da dor. Senlleiros, sentindo unha profunda saudade, cunha bágoa e un simple bico conmovedor. Somos, dúas ánimas bailando co vento, dous corazóns, esperando o amencer. Brétemas, devorando o quérote dun último alento, treboadas, esquecendo deixar as flores crecer. Jacobo Amado Calvo e Yago Calvete Bujía. 4º B ESO.

POEMA DE AMOR. Adrián Baliña Blanco, Inés Senra Rodríguez e Noa Souza Souto. 4ºC ESO

Ámote por sempre, vermella Toda a noite durmín contigo fíxenche dano, alma miña? O meu corazón que ten espiñas tes que abrir porta a porta pouco a pouco, paseniño paseniño. Buscas traballo de 3 quendas xa que ninguén ve a túa coroa de cristal porque ninguén mira ben. Ti anímasme a recoller rosas aínda que non perdiches o amor que che quixen quitar. Eu ámote por sempre, vermella. Adrián Baliña Blanco, Inés Senra Rodríguez e Noa Souza Souto. 4ºC ESO

Poema de amor. Carla Blanco García. 4º B ESO.

Poema de amor   Dúas mans entrelazadas dous corpos agarimosos. Verbas murmurantes beizos unidos nunha mesma loucura. O tempo que non conta, as horas que non pasan e as mans entrelazadas. Todo na vida é de cores, todo soa a música o corazón que palpita e as mans entrelazadas. Nada pasa ao seu arredor, o mundo é felicidade. Todo se pode conseguir e coas mans entrelazadas só están eles dous. Un sen o outro non son nada. Os dous son un só por iso sempre levan as mans entrelazadas.   Carla Blanco García. 4º B ESO.

POEMA DE AMOR. Fátima Zahra Ghadbane e Alexandra Rodríguez Hafdi 4ºB.

Poema de amor Pode que non me coñezas, pero vinte, vinte e puiden admirar o teu falar, o teu mirar e o teu camiñar. As persoas adoitan dicir que o amor a primeira vista non existe, pero eu penso que é algo inevitábel. É como nacer, nós non eliximos nacer, nin tampouco aos nosos pais e a nosa vida, non obstante estamos aquí: limitámonos a existir. Sinto que caio ao abismo, ao abismo do teu iris envolvente, que fai sentir a primavera máis preto que nunca. A túa presenza é como o vento, ás veces pode ser quente, outras, pode ser forte e frío, tan forte que sentes que che pode facer voar. Ti, ti que es o mirar dos meus ollos cheos de amor, ti, ti que non miras nunca atrás, ti, ti que non te fixas nas persoas do teu redor, e non obstante… séguesme tendo nos teus brazos, preocupado de se vou seguir viva, e sen que me coñezas, pódoche dicir con firmeza que non é a primeira vez que sinto que gaño cando estou perdendo. Como vou a esquecer o último respiro, por fin puiden verche os sentimentos a flor de pel… Fátima Zahra Ghadbane e Alexandra Rodríguez Hafdi. 4º B [...]

POEMA DE AMOR. Irene Ferreira Rabuñal. 4º C ESO.

Poema de amor Tan difícil e tan sinxelo soamente cunha palabra podo dicirche que te quero. Vergoña e medo atrápanme calada como gardando un segredo. Aínda non o expreso, algun día sairá? non o creo Vou, vou dicilo, que máis dá porque ti es a quen quero. Irene Ferreira Rabuñal. 4º C ESO.

POEMA DE AMOR. Amira Berrahou Bounous e Sandra Regueira Basoa. 4º B ESO.

Poema de amor Quero ser as mans que percorren o teu corpo. Quero ser a persoa na que pensas día e noite. Quero escoitar “quérote” saíndo da túa boca. Quero que non te esquezas de min. As nosas noites son de paixón e os nosos días de sentimentos. A nosa relación é unha corda, sempre tira e afrouxa ata que un día rompa. Contigo sempre prefiro perder para despois gañar o teu sorriso. Quero que sexas o meu espertar. Quero que alegres todos os días da miña vida. Quero bicarte ata ás dúas da madrugada. Quero que me queiras. Amira Berrahou Bounous e Sandra Regueira Basoa. 4ºB ESO.

POEMA DE AMOR. Lucía Sánchez Freire e Laura Marta Blanco 4º C ESO.

Lembranza do meu amor   Desexo vivir nun soño, sentir a túa boca o meu refuxio. Eternamente de amores xuntos a través dos infortunios!   Unha razón pola que sorrir sempre sobrevive ás chamas. Gran amor da miña vida, cantos motivos derramas!   Latexa o meu corazón nunha longa despedida, sen esixirche algo a cambio miña amiga querida!   Lucía Sánchez Freire e Laura Marta Blanco. 4º C ESO

ESTRÁÑOTE. Ouiam Demough. 4º C ESO.

Estráñote   Non moito, moito é moi pouco . Aínda que moito é positivo, eu ódioo. Moitos km, e a terra non vai dobrarse. Moito tempo , non pasará rápido por nós. Moita esperanza , e non chega. Quizais temos que esquecer todo iso , e pensar en: Onde nos atoparemos ? Como o pasaremos ? E como aguantamos ! Eu penso no laranxa entre vermello e amarelo . No gris entre branco e negro . Nas fronteiras, entre España e Marrocos. Onde pasarían os momentos inesquecibles, e todos eses sufrimientos serán esquecibles. Pobre a miña vida, cre que mo complica , non sabe que o meu amor é, a distancia que hai entre nós e mais o tempo, canto máis lonxe e lento, máis te estraño e te adoro !   Ouiam Demough 4º C ESO

POEMA DE AMOR. Pablo Naya Antelo e Manuela Fernández Castelo. 4º A ESO.

Poema de amor   Para min sempre serás benvido, que por todo o vivido, querido e falado, quero percorrer o camiño contigo.   Pasando por un vieiro de flores por onde iamos todas as mañás, aquel que tanto nos gustaba, pero que estaba cheo de pedras.   Parándonos a escoitar o piar dos paxaros, que facía que as nosas tardes voaran sen darnos conta. E por iso para min, sempre serás benvido.   Pablo Naya Antelo e Manuela Fernández Castelo. 4º A ESO.

Escenario de amor. Celtia Verdes Chouciño. 4º B ESO.

Escenario de amor   Coñecémonos e amámonos converteuse nun recordo que xamais esquecerei un melodrama que paga a pena ver cun final axeitado, iso é suficiente para min, amábate.   Fixemos o noso escenario de amor, agora as luces apáganse, e cando pasamos a páxina a cortina cae.   Aínda te boto de menos, dicilo fai máis dano, o tempo é cruel, o inverno é longo se ti non estás.   Pero xa rematou todo, a primavera chegará pode que non te volva a ver, así que, esteas onde esteas que saibas, que non me arrepinto de nada.   Celtia Verdes Chouciño. 4º B ESO.

EROSKI-PARAÍSO

O alumnado de 1º de Bacharelato puido asistir a unha magnífica obra teatral que se representou no centro ÁGORA da Coruña. Tratouse dunha actividade organizada polo Equipo de Dinamización Lingüística e o Departamento de Actividades de Biblioteca do IES Manuel Murguía, que se desenvolve dentro do programa de saídas que levamos a cabo ó longo do curso e que ten como principal obxectivo achegar a rapazada do centro á realidade cultural que nos rodea. Neste caso falamos dunhas desas grandes obras ás que nos ten acostumado o grupo Chévere. Falamos de EROSKI-PARAÍSO, un traballo que ademais de divertirnos, fainos reflexionar sobre o mundo no que vivimos e os cambios sociais e económicos que se están a producir na nosa contorna. Agradecemos ao Concello da Coruña as facilidades para poder asistir á mesma, e por suposto ao alumnado que unha vez máis demostrou un comportamento excelente. Moitas grazas a todas e todos!!! Agardamos que vos gustara!

Condenado por amar. Hugo Herrador Segade. 2º A ESO.

Condenado por amar Non entendo por que Andar ás agachadas Escondido do que amas Escondido de ti. Eu xamais me esconderei Do meu amor Porque non é delito quererte Corazón. Se fora un delito quererte Estaría condenado Atado, encadeado. Se fora un delito quererte Cadea perpetua Sería  a miña sentenza. Se fora un delito quererte Eu quereríate máis. Hugo Herrador Segade. 2º A ESO.

Un amor por San Valentín. Hugo Herrador Segade. 2º A ESO.

Un amor por San Valentín Mirándote Escoitándote Sentíndote Coas ganas sempre De verte. Que es a luz Que me iluminas Es a ledicia Do meu día Es o sol De todas as miñas mañás. E non sei Se algún día Te decatarás Pero érgome Pensando en ti. Con ganas de verte outra vez Pensando que terei valor De confesar o meu amor Que non sei se fago ben Ou non. Pero sabendo Que te quero Cun único obxectivo Na miña vida Quererte Cuns ollos Que solo se fixan en ti Cunha mente Que exclusivamente Pensa en ti. En como darche un bico Antes de que digas Arrepíntome Que non paro de pensar En como te namorar. En como abrazarte En como a ti arrimarme. En como lembrarte Que te quero. Hugo Herrador Segade. 2º A ESO.

Poema de amor. Cristina Rivero e Nerea Vázquez 4ºB

Poema de amor.   Ela é a máis bonita, ela é pura dozura, quen me dera poder tela e mirar xuntos as estrelas.   Desexo estar con ela, mais ela non quere estar, pero sei que con esforzo, todo se pode lograr.   Non sei como nin cando, pero dela funme namorando.   Volvamos ao pasado, cando eu estaba xogando, ela coas súas amigas, polo camiño ían paseando.   Esa noite no meu cuarto, eu só andaba pensando, no que o sono me estaba quitando.   Aquela rapaza loira, alta e de ollos claros que facía días estivera ollando.   Cristina Rivero Villar e Nerea Vázquez Fornos. 4º B ESO.

Poema de amor por Ainoa Perpiñá e Ana Cardona. 4ºB ESO.

Poema de amor Non creo que teña que repetir o difícil que é para min, rompiches os meus esquemas e é por iso que non sei moi ben o que sinto por ti; Namoreime, namoreime das túas caricias que desprendían máis caricias, dous teus bicos que me facían desexar máis bicos. Non estás ao tanto das veces que te pensei, non sabes que estou farta de só palabras, e incluso de todas as palabras que esperei de ti. Non quero perderte, non quero nada diso; Só quero un día máis ao teu lado, e que se repita por sempre. Ainoa Perpiñá e Ana Cardona. 4º B ESO.

Pensando en ti. Hugo Herrador Segade. 2º A ESO.

Pensando en ti. Collo o bolígrafo Póñome a escribir E todos os meus pensamentos Céntranse en ti E ás veces creo Que a ti Che pasa o mesmo. Hugo Herrador Segade. 2º A ESO.

Amor extraterrestre. Hugo Herrador Segade. 2º A ESO.

Amor extraterrestre O noso é doutro planeta Hoxe chámase Venus E mañá chamarase Marte Conectámonos por telepatía E sorrimos Ao ver ó outro sorrir. Estamos conectados E antes de cruzarnos Xa soubemos Que nos iamos encontrar O noso foi un amor A primeira vista Con medo de vernos E non volvernos A cruzar Hugo Herrador Segade. 2º A ESO.

Poema de amor. Salah Edden Bourtal, Oussama Ez Zahori e Jamal Najib Chaarani 4º B ESO.

 Poema de amor Sinto que a túa man é a miña caricia, Sinto que o teu soño é o meu desexo, Direiche desexos nos teus beizos, o pracer será a miña arma para soñar, No paraíso dos teus ollos, Estou perdido porque estou perdido, Vostede sabe o silencio e os soños, con melodías de tenrura e toque de desexo, Cando o teu bico é unha caricia cando é un espertar contigo, Moitas razóns para pensar cen para admirarte Viviremos nun castelo feito con amores á beira de ti todo é sorriso Son sentimentos que me levan a vostede Vostede escribe con bicos no libro de amor Salah Edden Bourtal, Oussama Ez Zahori, Jamal Najib Chaarani.  4º B ESO.

Medo, a súa historia. Hugo Herrador Segade. 2º A ESO.

Medo, a súa historia. Ás veces síntome triste, a xente non me ve tal e como son (ou creo ser) . Estiven na pel de practicamente todo, e aínda non sei quen son. A maioría da xente, ao verme foxe de min e non entendo por que (supoño que será o instinto humano). Chámanme e logo escapan. Nin me imaxino como se sente miña irmá: a Fobia; e meu pai: o Terror. Gustaríame coñecer a miña nai, aínda que ela, desgraciadamente, foise ó ceo durante o meu nacemento. Morte era amigo do meu pai e dixéralle que era probábel que tivera que ir a por ela naquel intre, mais meu pai non o creu, e ocorreu a traxedia. Miña nai, segundo todas as persoas que a coñecían, era unha muller fantástica, chamábase Ledicia, gustáballe escribir e tocar o piano. Eu seguín a súa pista, até que Morte veu por min, entón soltei o bolígrafo… Esta vez para sempre.   Hugo Herrador Segade. 2º A ESO.

Poesía do medo. Hugo Herrador Segade. 2º A ESO.

Sombra gris que me acompañas Que me axudas Aínda que me distraias Que non es perfecto Pero es un bo sentimento Que tivemos os nosos máis E os nosos menos Grazas a ti Meu amor non perdín Máis teño medo a perdelo MEDO Ti axúdasme Aínda que nunca pense en ti Axudáchesme a salvarme Aínda que poida resultar frustante Que sempre me acompañes Es o medo. Hugo Herrador Segade. 2º A ESO.