EDL do IES MANUEL MURGUÍA - Contáctanos

DSC_0325

MARÍA CANOSA ESTIVO NO MURGUÍA

O 13 de abril agasallounos coa súa presenza a escritora María Canosa para falar da súa obra O neno Inverno, un libro que acadou moito éxito entre o alumnado de 1º ESO. Tiveron a oportunidade de charlar coa autora e preguntarlle sobre a novela, o mundo editorial, a súa vida… Agardamos que vos gustara e aproveitamos para agradecerlle de corazón a María Canosa a súa visita e a súa simpatía. Moitas grazas!!!

DSC_0291

VISITAMOS CABANA DE BERGANTIÑOS E PONTECESO.

abril 11, 2018 by ACTIVIDADES, VISITAS No Comments

O alumnado de 1º Bacharelato tivo a oportunidade de coñecer un dos monumentos megalíticos máis importantes da nosa terra: o Dolmen de Dombate. Tamén se aproveitou a viaxe  para achegarnos ao fermoso Castro de Borneiro e á casa natal do poeta Eduardo Pondal, que neste curso é obxecto de estudo na materia de Lingua Galega e Literatura e que está relacionado vital e literariamente con estes lugares. Aquí tedes algunhas fotos!  

DSC_0268

XAVIER ALCALÁ NO NOSO CENTRO

Hoxe, 4 de abril de 2018, estivo connosco o escritor Xavier Alcalá, que nos deu conta da súa visión deste convulso mundo no que vivimos e ademais falounos da súa vida, obra, e por suposto, de Cárcere Verde, novela que leron os alumnos e alumnas de 4º ESO. Esta visita é froito da colaboración que levamos a cabo ó longo do ano entre os Departamentos de Lingua Galega, Lingua Castelá, Actividades de Biblioteca, Club de Lectura e Equipo de Dinamización Lingüística do noso instituto. Agradecémoslle a súa estancia no IES Manuel Murguía. Agardamos que vos gustara!

DSC_0238

O PERGAMIÑO VINDEL

febrero 7, 2018 by ACTIVIDADES, VISITAS No Comments

As cidades de Vigo e Pontevedra foron obxecto da nosa visita para coñecer dous museos imprescindibles: o de Pontevedra e o Museo do Mar de Vigo. O obxectivo principal foi coñecer unha xoia das nosas letras: o Pergamiño Vindel, de importancia capital para a  cultura galega, xa que se trata dun manuscrito do s. XIII que nos amosa como era a música das cantigas de amigo. Recolle sete cantigas do trobador Martín Códax, das que seis teñen notación musical. Pocede da Biblioteca Pierpont Morgan de Nova Iork, e estará en Galicia até o mes de marzo. Polo tanto tratábase dunha oportunidade única para coñecelo. O Museo do Mar tamén resultou de interese por atoparse alí obxectos relacionados co mundo marítimo, tan ligado a Galicia ou, por exemplo, o submarino de Sanjurjo Badía ó que fai referencia a escritora Ledicia Costas na súa obra A vida secreta das mulleres planta. Aproveitamos tamén para realizar unha visita guiada polo Museo de Pontevedra, onde o alumnado do IES Manuel Murguía puido achegarse a obras e obxectos de Castelao, Asorey, Lloréns, Soutomaior, Ovido Murguía, petroglifos ou o fantástico tesouro de Caldas de Reis. Aquí vos deixamos algunhas fotos. Agardamos que vos gustara todo e grazas polo voso comportamento!!!

DSC_0110

LUCÍA ALDAO E MARÍA LADO NO IES MANUEL MURGUÍA.

O mércores 24 de xaneiro estiveron connosco o dúo AldaoLado para dar a coñecer ó noso alumnado a súa fermosa poesía por medio dunha actuación chea de humor, música e creatividade. A rapazada do Manuel Murguía puido decatarse de que a poesía pode ser un produto accesible e divertido, algo que tanto Lucía como María deixaron moi claro cunha actuación que nos fixo rir e emocionarnos. Agradecemos dende o Equipo de Dinamización Lingüística, Club de Lectura e Departamento de Actividades de Biblioteca, o comportamento exemplar do rapaces e rapazas, e por suposto, tamén damos as grazas ás poetas polo traballo ben feito, desexando que volvan por Arteixo moi pronto. Queremos agradecer tamén ó concello de Arteixo a cesión do Centro Cívico para este recital. Agardamos que vos gustara!!!

DSC_0004

ROTEIRO POLA CORUÑA, VISITA RAG E MUSEO EMILIA PARDO BAZÁN.

noviembre 9, 2017 by ACTIVIDADES, VISITAS No Comments

O alumnado de 4º ESO  realizou un roteiro pola Coruña, organizado polo EDL, Departamento de Lingua Galega, e Departamento de  Lingua Castelá. Visitáronse, entre outros lugares: Real Academia Galega, Casa Museo Emilia Pardo Bazán, xardíns de San Carlos e Méndez Núñez, monumento a Curros Enríquez, casas nas que viviron Rosalía de Castro, Manuel Murguía, sede da Editorial Nós, revista Alfar, Irmandades da Fala… Agardamos que fora una visita de proveito para a vosa formación escolar e cultural. Grazas polo voso comportamento! Aquí van algunhas fotos.    

DSC_0193

O alumnado de 4º ESO visita Sargadelos/O Castro (Sada) e o pazo de Mariñán (Bergondo)

mayo 7, 2017 by ACTIVIDADES, VISITAS No Comments

O venres 5 de maio visitamos cerámicas O Castro e o pazo de Mariñán. Os rapaces e rapazas do centro puideron percorrer as instalacións da fábrica creada por Isaac Díaz Pardo e Luis Seoane, entre outros. Alí puideron ver como era o proceso de produción e a galería de exposición e ventas. Ademais tiveron a amabilidade de ensinarnos o museo, onde hai orixinais de artistas da talla  de Castelao, Laxeiro, Seoane, Díaz Pardo, Maside, Lugrís… Despois desprazámonos a Bergondo para visitar o pazo de Mariñán, onde nos contaron a súa historia e nos ensinaron as obras de arte que alí se conservan. Tamén tiveron tempo para pasear polos seus fermosos xardíns a carón do río Mandeo, e para gozar das fermosas vistas con Betanzos ó fondo. O próximo día 12 de maio volveremos con outros dous grupos. Aquí vos deixamos algunhas fotos. Parabéns  unha vez máis polo voso comportamento!!!    

IMG_0376

O TÍRALLE DA LINGUA CONTOU COA PRESENZA DO NOSO ALUMNDO NA FASE FINAL DE SANTIAGO

TÍRALLE DA LINGUA, FINAL EN COMPOSTELA Parabéns a Martín, Pedro, Joel e Daniel!  Melloraron con ganas os seus relatos nas súas actuacións, mais o nivel dos/as participantes foi moi alto, viñemos co agasallo dos aplausos recibidos e das risas e emocións vividas nesta XVII edición, na que participaron centros das catro provincias galegas. Parabéns tamén aos gañadores do CEIP Fogar, de Carballo; do CEIP A Mariña, de Reinante; do IES Díaz Castro, de Guitiriz; do Aquis Querquennis, de Bande (con premios en dúas categorías!!) e do IES Aquis Celenis, de Caldas de Reis, e o noso agradecemento á Asociación Socio Pedagóxica Galega polo seu traballo á fronte deste certame, potenciando a diversión e o valor da nosa lingua Actuación Joel e Daniel 1º Bacharelato Actuación Martín e Pedro 1º G Foto da entrega de premios no Teatro Principal Foto dos palcos do Teatro Principal de Santiago, onde se celebrou a fase final.   Foto dos nosos representante durante a primeira fase de centro.    

IMG-20170423-WA0019

O alumnado do club de lectura visitou o centro Ágora na Coruña

Esta semana alumnado do noso centro, pertencente ó club de lectura da biblioteca escolar, asistiu a un obradoiro literario que se desenvolveu no ÁGORA  da cidade herculina. Alí tiveron lugar diferentes actividades relativas á creación literaria e deixaron fluír a arte que levan dentro unha vez máis. Parabéns a tod@s pola vosa actitude e comportamento!!!

DSC_0005

ANDREA MACEIRAS CONVERSA COS RAPACES E RAPAZAS DO IES MANUEL MURGUÍA

Hoxe, 21 de febreiro de 2017  tivemos o pracer de contar coa presenza da escritora Andrea Maceiras, que dialogou co alumnado do noso instituto e analizaron en profundidade a novela Europa Express, da Editorial Xerais (Premio Jules Verne 2015). Ademais fixo referencia a outras obras anteriores e contounos curiosidades do mundo da escritura profesional. Finalmente asinou exemplares dos seus libros e agasallounos coa súa simpatía.   Moitas grazas, Andrea!