EDL do IES MANUEL MURGUÍA - Contáctanos

Vicente Feijoo fálalles da toponimia de Arteixo aos alumnos do IES Manuel Murguía

Do Cu Cagado ao Quinto Pino e outros topónimos interesantes ;)

mayo 20, 2014 by ACTIVIDADES, OBRADOIROS No Comments

Por que en Oseiro hai unha pedra que se chama O Cu Cagado?  Disque é un nome habitual en toda a costa galega (por exemplo, O Con Cagado), porque son pedras cagadas polos corvos mariños, pero se cadra, como comentaban algúns alumnos que llelo oíron contar aos seus avós, débese a que cando baixa a marea esta pedra semella un cu cunha parte negra na rocha, como se estivera cagado. Por que non lle sacades unha foto á pedra e investigades o nome preguntándolles aos vosos avós?

Investigar é o que leva feito arreo o noso convidado de onte, Vicente Feijoo Ares, que durante moitos anos foi o coordinador dos traballos de campo do proxecto Toponimia de Galicia e que actualmente traballa no Seminario de Onomástica da Real Academia Galega.

Vicente estivo aquí no Instituto con alumnos de 3º ESO e de 4ºESO. Falounos de nomes ben curiosos do noso concello e das súas orixes: Lama Má, O Salto do Carro, A Silla do Rei, O Coto das Meigas, O Porto das Bendicions ou O Cabo Cociñadoiro. Ensinounos que detrás dos nomes hai paxaros, ríos, montes, pedras, ritos, lendas… Cantas sorpresas levamos!

A partir de agora sen dúbida ímonos fixar máis nos topónimos do noso contorno, porque detrás deles agóchase parte da nosa terra e da nosa historia, é dicir, da nosa cultura. Así que ímolos coidar!

- E que non sabemos se é Vilarodís :( ou Vilarrodís ;) , Arteijo :( ou Arteixo :) , Uges :( ou Uxes :D ? Pois consultámolo no Nomenclátor!

- Fixástevos nas ortofotos que levan unhas semanas polos corredores do instituto? Nelas podemos atopar o nome dos lugares do concello de Arteixo, das nosas aldeas e vilas, e tamén dos montes e leiras.

- E que nos molaron os mapas e queremos atopar a nosa aldea e os nomes todos de arredor en Internet? Pois podemos facelo no buscador de topónimos da web do Proxecto de Toponimia de Galicia. Só do noso concello recolle máis de 5.000 microtopónimos!